BACK DOOR Boletin Lia-Foun Kona ba Timór Loro Sa’e
Uma-fatin (pájina primáriu) | Lia-tetun | Lia-indonézia | Lia-portugés | Buka website ne’e
"Tanba ne’e maka Lao Hamutuk husu ba Governu Australianu atu halo kotu sira nia tuntutan ba direitu ruma kona ba mina no gas natural iha Timor Gap. La haré ba meritus legais nebe Timor Lorosa’e iha (ne’e be makas tebes), justisa basika haruka atu Canberra rekonhece no husu deskulpa tan sira nia passadu nebe halo moe tebes. Manifestasaun konkretu kona ba akto ida ne’e sei fo fatin ba Timor Lorosa’e atu menikmati, tanpa sanksi, beneficius hotu nebe sei hetan husi depositu mina no gas natural iha Timor Gap." La’o Hamutuk, Instituto Timor Lorosa’e ba Analiza no Monitoring Reconstrucao


Boletim La’o Hamutuk  Vol. 1, No. 3: 17 Novembro 2000

Hari Sistema Saude Nasional iha Timor Lorosa’e


Saude, Rikusoi, Deskulpas, no Mina: Koneksaun Timor Lorosa’e ho Australia

Populasaun Timor Lorosa’e nian hetan moras barak, liliu tanba kiak no mos simplesmente tanba laiha aimoruk, teknolojia no ema nebe treinadu kona ba saude ninian.

Hanesan moras mear ran ka tafui ran (tuberkulose), nebe uluk nasaun sira iha ocidente neba tauk tebtebes, ohin loron moras ne’e la dun iha ona. Maibe iha Timor Lorosa’e, ema barak maka hetan moras ida ne’e. Ne’e tanba nivel nutrisaun no sanitariu publiku nebe oin seluk no mos rekursus nebe la hanesan.

Analistas internasionais sira dala barak hateten katak rekursus necessarius nebe la iha, ka kiak. hanesan ita hetan iha Timor Lorosa’e ne’e no mos problemas saude seluk tan, buat ida nebe ita labele evita, ne’e hanesan buat natural ida nebe ita labele muda. Maibe negosiasaun nebe oras ne’e hala’o hela kona ba se maka iha direitu kona ba mina no mos gas natural nebe iha Timor Gap, hatudu katak ita bele muda ita nia moris kiak. Liliu, ida ne’e nudar ekspresaun material kona ba realasaun kbiit nebe la hanesan.

Timor Lorosa’e terus tebes tanba relasaun kbiit nebe la hanesan. Nasaun riku no kbiit-wain barak maka la moe hodi fo apoiu ba Indonesia hodi invade no ocupa Timor Lorosa’e tan deit sira hakarak atu mantem sira nia relasaun diak ho Indonesia ne’e be riku ho rekursus barak. Nasaun sira ne’e ida maka Australia.

Iha provas barak ne’e be foin dadauk ne’e hatudu katak iha tinan 1974-1975 Governu Australia hatene didiak kona ba Indonesia nia plano agresaun kontra Timor Lorosa’e. Oficialmente, Canberra hatudu nia apoiu ba auto-determinasaun. Maibe realidade hatudu katak Governu Australia fo aten barani ba Indonesia nia asaun hodi konsulta ho Jakarta kona ba sira nia plano at ba Timor Lorosa’e. no mos la hateten no la halo buat ida hodi hatudu katak sira kontra Indonesia nia plano atu tama iha eks-kolonio Portugal nian ne’e. Los katak, ulun boot Australia sira dala barak hatudu katak sira prefere Timor Lorosa’e ne’e hanesan parte Indonesia nian, laos hanesan nasaun independente ida.

Durante Indonesia nia okupasaun ilegal ne’e, Canberra fo treinu militar no kilat, troka ba mai informasaun inteligensia nian, no mos halo manuver militar hamutuk ho Jakarta. Karik la iha nasaun ocidente ida maka liu Australia hodi servisu maka’as tebes hodi subar diplomatikamente kona ba Indonesia nia atrocidades iha Timor Lorosa’e. Australia halo liu ne’e, bainhira nia rekonhese de jure Indonesia nia aneksasaun brutal kona ba Timor Lorosa’e, hanesan passu (hakat) ida necessariu atu tama ba negosiasaun kona ba Timor Gap.

Besik tinan sanulu resin ida depois de assina tia tratadu iha fulan Desembru tinan 1989 Australia nia peranan iha Timor Lorosa’e nia terus no Timor Gap mosu fila fali iha centru politikaTimor Lorosa’e nian.

Iha loron 31 fulan Agostu nian, estudante lubun ida halibur iha Universidadi Timor Lorosa’e hodi hasoru malu ho Ministru Negocius Estrangeiru Australia nian, Alexander Downer, haka’as nia atu hussu deskulpa tan Cambera nia keterlibatan iha Indonesia nia invasaun no okupasaun iha sira nia rai. Maibe, infelizmente sesaun tanya-jawab ho Downer ne’e be promete tiha ona la jadi halo.

Oras ne’e daudaun, Administrasaun Transitoria Timor Lorosa’e nian, halo hela tratadu foun ida ho Australia. Iha akordu 1989 nian, Canberra no Jakarta hafahe Timor GAP ne’e halo ba rua hanesan. Ulun boot Timor Lorosa’e no Nacoens Unidas lokal sira hakarak atu dada foun fali linha ketan ne’e, hodi bele konsistente ho lei internasional. Iha Nacoens Unidas nia Konvensaun kona ba Lei Tasi nian, tinan 1982, nasaun sira nebe haketak malu ho tasi leguas 400 nia laran, sei hafahe sira nia tasi ne’e halo ba rua iha klaran. Tan ba depositu mina no gas natural ne’e iha Timor Lorosae nia tasi laran, maka Australia sei tenki desisti tiha hosi sira nia direitu ruma kona ba depositu ne’e.

Maibe, hanesan Business Week haktuir iha nia isu 30 Outubro 2000 nian, Governu Australianu lakohi katak lei internasional ne’e atu manda iha negosiasaun sira ne’e. Pelu kontrariu, Canberra sei utilisa nafatin ninia interesse propriu hanesan ida nebe hatudu sira nia apoiu ba Indonesia nia krime husi tinan 1975 to’o 1999, hodi rekusa atu hasai tiha sira nia tuntutan kona ba mina no gas natural ne’e. Australia reinforca sira nia tuntutan ne’e ho ameacas.

Diplomata ida hussi ocidente nian, hanesan Business Week haktuir, hateten katak Canberra ameaca atu ko’a tiha nia orsamentu tinan hat nian, tokon $75, programa ajuda ba Timor Lorosa’e, kecuali Timor Lorosa’e respeita tratadu ida uluk ne’e. portavos ida hosi Ministeriu Negocius Estrangeiru nian iha Canberra basikamente konfirma relatoriu ne’e.

Governu Australianu fo osan barak duni ba seguransa no ajuda humanitaria iha Timor Lorosa’e desde fulan Setembro tinan 1999. Maibe osan ne’e kikoan no la iha folin bainhira ita kompara ho sira nia keterlibatan iha Indonesia nia krimes. Iha Aksaun base Australia nian ba Soliedaridade ho Indonesia noTimor Lorosa’e (Australia-based Action in Solidarity with Indonesia and East Timor), fo hatene dadaun ne’e katak “Intervensaun militar Australia nian iha Timor Lorosa’e ne’e tan deit apoiu nebe sira fo durante tinan 25 ba Suharto nia invasaun iha Timor Lorosa’e. Karik sira iha kebijakan atu rekusa apoiu militar, politika no diplomata ba Suharto nia kebijakan durante tempu ne’e hotu, kombina ho sira nia apoiu ba direitu auto-determinasaun nian, maka sira ajuda atu hakotu Timor Lorosa’e oan sira nia terus kleur ona.”

Tanba ne’e maka Lao Hamutuk husu ba Governu Australianu atu halo kotu sira nia tuntutan ba direitu ruma kona ba mina no gas natural iha Timor Gap. La haré ba meritus legais nebe Timor Lorosa’e iha (ne’e be makas tebes), justisa basika haruka atu Canberra rekonhece no husu deskulpa tan sira nia passadu nebe halo moe tebes. Manifestasaun konkretu kona ba akto ida ne’e sei fo fatin ba Timor Lorosa’e atu menikmati, tanpa sanksi, beneficius hotu nebe sei hetan husi depositu mina no gas natural iha Timor Gap.

Gestu ida ne’e sei diak duni ba Australia nia bem-estar politika. Ne’e mos sei fo rekursu financial ba Timor Lorosa’e nebe precisa tebes, atu nune’e bele garante acessu diak tebes ba Timor Lorosa’e oan sira atu hetan ajuda ba sira nia saude saugate deit ho kualidade diak, no mos atu hari’i infrastrutura social ekonomika nebe necessariu hodi hamenus sira nia kiak, nebe ema moras barak maka eksperiencia (liu tiha ona).

Avancu iha sociedadi ida nia saude laos tan deit rikusoi. Nasaun barak nebe iha meius modestu ka sederhana mos bele hetan progressu boot. Hanesan Cuba, embora nasaun “Terceiru Mundu” ida nian, hala’o ona avancu nebe diak tebes iha sira nia servisu saude nian.

Maibe rekursus importante tebes duni. Pelu menus, tenki iha suficiente para bele satisfaz necessidades basikas, hamutuk ho kemauan politik atu fahe rekursus sira ne’e iha modu ida nebe hanesan.

Tanba ne’e maka, tuberkulose - nebe bele oho ema barak iha Timor Lorosa’e - iha relasaun ho minarai no justisa.



Hasoru Malu Fali ho Boletim La’o Hamutuk . . .
85k PDF format Tetum: Boletim La’o Hamutuk

La’o Hamutuk, Instituto Timor Lorosa’e ba Analiza no Monitoring Reconstrucao
P.O. Box 340, Dili, East Timor (via Darwin, Australia)
Mobil fone: (0408)811373; Telefone uma: 325-013; Email: lhproject@one.net.au

Saida mak La’o Hamutuk? Iha espirito hodi promove transparencia nebe makas liu, La’o Hamutuk convida individual atu contacto ami se iha documentos no/ou informacao nebe relaciona ho reconstrucao nebe iha interesse ba povo Timor Lorosa’e no membros comunidade internasional.
Haruka buat lia-foun, reportajen, ai-knanoik ho istória jornalista lia-loos sira ba BACK DOOR nia korreiu ba li’ur elektróniku: wildwood@pcug.org.au

Korreius: BACK DOOR, GPO Box 59 (Kaixa 59), Canberra City (Sidade Canberra), ACT  2601, AUSTRALIA
Se Ita hakarak simu boletin lia-foun semana-semana karik Ita bele email wildwood@pcug.org.au ho liafuan ‘Subscribe BACK DOOR’ iha kabesallu mensajen ne’e. Boletin email sira hakerek prinsipál lia-inglés. Dala balu nia inklui liafuan bahasa, lia-portugés i lia-tetun.
BACK DOOR Boletin Lia-Foun Kona ba Timór Loro Sa’e

Uma-fatin (pájina primáriu) | Lia-tetun | Lia-indonézia | Lia-portugés | Buka website ne’e
Email (korreiu ba li’ur elektróniku): wildwood@pcug.org.au
WEB-fatin (Pájina primáriu): http://www.pcug.org.au/~wildwood